Magellan

Lýsing

Portugisiski rannsóknarmaðurin Ferdinand Magellan (1480–1521) er ein av heimsins kendastu sjófarum – hann sigldi sum tann fyrsti av øllum frá Atlantshavi til Kyrrahav og stóð á odda fyri fyrstu sjóferðini at sigla kring allan knøttin, tó at hann læt lív á ferðini.

Í hesi ævisøguni birtir Zweig lív í øldina við teimum mongu rannsóknarferðunum og sigur søguna um eina ta djarvastu royndina. Á sín egna sniðfundiga hátt ger hann ferð við okkum, har vit samstundis rannsaka okkum sjálv.

Longu sjóferðina fíggjaðu spanski kongurin Karl V og ein niðurlendskur handilsmaður, Christopher de Haro, og endamálið við ferðini var ikki gull, heiður og Guð, sum oftast verður hildið, men matur! At fáa smakk í matin hjá evropearum. Krydd sum pipar, kanel, muskatt og nelikar fekst ikki í Evropa. Tað varð innflutt ígjøgnum arabiskar handilsmenn og var ørandi dýrt. 

Krydd var so virðismikið, at hóast bert tað eina av fimm skipum kom aftur í 1522, gav tann kryddlastin stórt yvirskot av ferðini, ið annars vardi í trý ár og kostaði 237 monnum lívið.