Charlie Hebdo

Meðan sorgin legði seg í sinnið eftir miskunnarleysa drápið á keiputeknararnar í París, festi Frits Johannesen hesa inniligu yrkingina á blað.

Skriva eitt orð,
skriva ein setning
–

ger eina tekning –

lat myndataluna í orðum

og myndum

avspegla

samfelagið,

har ráðandi fólk

á palli í
peningagyrðing,

í  guðagivnum bási

hella vanga

og lyfta
lítlafingur og mæla:

Krónan er stór og
Guð er lítil!

Orð og penna- og
penslastrok

fara um allar
geilar,

men koma at
gørðum,

har útraksturin

bert er í einum
stað,

har valdsharrar og
andans gorlakkar

sláa við veingjum

sum øskulittir
vetrarfuglar,

ið nápa av hvítmyljum

og hjómhvítum
landbrimi

á vetrardegi

á firðum og fram
við fjøruklett.

Stokkut var
stundin við fjøruklettin –

Charlie Hebdo,

har døkkir, dimmir, svartir vetrarfuglar

gjørdu bart –

týndu, særdu
og  slerdu við sínum veingjum

á myndir,
tekningar og skrivaða orðið,

so blóðið fleyt.

Lat okkum til
ævigar tíðir TEKNA og skriva

við blóðlittum
stavum.

Leingi livi frælsið:
Charlie Hebdo!!!

Deil á